釜山2010/08/27 第三日

一早起身搭的去邊真係唔記得左:P 仲之就係搵SEVEN LUCK 唱錢~~

經地下街~

唱完錢仲好難得地賭嬴左少少!

之後就搵野食啦~原本想食0個間原來執左, 就去呢間釜山食堂食豬肉湯飯, 好似雪濃湯不過呢個係豬肉唔係牛肉
夏天食呢個真係熱到7彩! 不過咖啡原來任飲

之後就搭去南浦洞既購物街~又買左對EVERLAST既布鞋:P不過價錢問題無買到最鍾意既反筒款...求其啦...

冬天時係凍到飲咖啡, 夏天就熱到飲咖啡. 特別係有特價XD

累得制又入左LOTTE~新開的, 仲有表演

南浦洞就係龍山公園既入口, 好彩有電梯上...不過都係頂唔順要買乳酪食....我肥左好多,,,

落山去扎嗄其市場食魚生~~~

又係一大堆伴菜, 好蠢咁無格價就咁比D阿姐拉左咁黎..不過都係唔算貴既.

生的保羅, 係咁郁, 真係會吸住個咀. 聽聞係點0個D油防止佢吸喉嚨, 會死人的.

霸氣魚!個咀仲係識郁...其實係好殘忍..我就一般了對呢D...

送既蛋餅

送既燒秋刀魚.

好有風味, 不過對腳好痺- -

呢個堅正, 係岩岩條魚生食完之後, 整成辣既魚湯, 係超級好味!!!辣得黎好爽!!

其實就係街市~

附近又係呢D夜市既物體, 韓國好多地方都有小攤.

行行下見有抽獎, 轉個抽獎輪,送買一送一劵呀0個D, 唔洗錢. 比我抽到份大禮, 沙灘X, 好開心啦, 點知下一個既余炳炳都係抽到同一份=0=咁難中都連中..

好味的紫菜卷, 一條500WON ONLY, 即係3元一舊~

返到酒店又過對面FM 食野XD

如果你要我學會忍耐 我想我已一早學會放手

OB應該係我最憎既一科.

完全無心機溫, bullshit theory!!

釜山2010/08/26 第二日

原本係話4點起身上東海龍宮睇日出的, 不過又驚落雨(出發前幾個天文網都話呢幾日會落雨..)又好難起身同搭車XD就改左行程睏到9點幾啦~

T-MONEY搵左幾個地方都無得增值...好麻煩...

搭巴士去SongJong?? breach~(不知名沙灘...)

好勁咁無落錯車, 但係就搵唔到某人一直想搵既野, 係咁行行行...又未食早餐...又熱....堅係辛苦...

終於放棄左~搵野食為上!!見到呢個好靚既酒吧

晨早流流緊係唔飲酒...上左呢間cafe,好靚:)

成間店有2層, 得我地2個客....0係比錢時因為搵散紙, 老闆以為我地唔夠錢就話唔洗比0個剩低既錢...

好靜,好悠閒

無咩人既breach~炎炎夏日踢下水真係透心涼~之後就搭的士去東海龍宮

唔洗摸住...

我要順利grad...

搵左個靚仔幫我地影合照:)竟然唔記得拎艾石個相機架出黎...

救命水

無濃濃既香煙味, 好舒服既地方, 好靚again,但係唔知點解好多內地人- -


搭巴士出海雲臺,新開既mall  enter-6

影貼紙相~可以拎佢d衫同假髮黎玩, 又有無限時間畫畫...因為呢個鐘數應該無咩人會好似我地咁得閒...

lunch~

硬係要搞到d人既腳濕哂又有咩為呢...

海雲臺breach!!!!!0個到locker要比錢

好似成個沙灘大部分人都唔識游水咁,好多人都會租水泡, 有少少浪都0係到e wa鬼叫=.=

好多bikini... 但係好多都用帽同毛布摭著塊面驚哂黑(重點係佢地都有化妝)...

望一望自己...身材..天生既...樣...um...一樣係天生既,無咩好講(反正就係唔夠佢地靚)...皮膚...黑過0個到d男仔...防哂...無...咩防黑既野都無...確實係:呢個世界上無醜既女人，只有懶既女人

d水好清好涼仲好浮,個頭完全唔洗浸落水都浮到!難得地感受到游到水既感覺(我平時只係識浮,唔識換氣)真係游得好開心

6點前要交locker     沖涼都要比錢...淡水仲要係時有時無...所以唔比用番皂=.=當然見大家入左去都有用時我都偷偷地用d啦...幸好已經慣左同一班女人赤裸裸地沖涼

夜晚有表演

換完衫出黎係咁影相:)

究極拖鞋印....我又黑了...

夜晚既海雲臺係超級靚,可惜相機始終都係影唔出...

去casino兌錢, 釜山唔似首爾周圍都有找換店，多人兌既都只係日元同美金,所以人仔個價好唔靚.

突然記起...套泳衣留左0係沖涼既地方地下....返到去搵已經關左門..好彩套野係舊野...已經幾年無著

搵到間好抵食既燒肉!雖然薄切點都唔夠三層肉同五花腩好味, 但係釜山周街得薄切既,而且真係好抵同唔錯既~

食飽飽返返去enter-6 到買野~

再去尋找傳說中既劍道用品店.            門已關

突然行雷閃電兼落雨, 好彩我有帶摭,但係第一次驚閃電,附近無咩高樓大廈,好驚被劈中

行超市~架車有塊磁吸住個電梯,唔會掉落黎,真係好方便

買野買到唔記得時間...去到地鐵岩岩好聽到架車走左....shxt...最後要搭的士...

因為的士司機唔知酒店0係邊既關係...搞左好耐佢先明點去....引申到最後同蛇吵大架了...我幫唔到手?定係你唔係一個可以比我依賴既人....:(...0個時真係想即刻返hk...

釜山2010/08/25_第一日

8月頭0個時...行行下街...突然講起去旅行...睇睇下...發覺暑假不旅行更待何時..最後就咁走左去睇套票.

原本係想去台灣~點知發現原來HK都有機去釜山，講真，釜山係一個點既地方我完全唔知，但係見25號開始唔收附加費就轉左呔去報釜山.

可惜當時平既港龍已經FULL哂,唯有得到老豆既approval之後拿拿臨報貴成7舊幾既大韓....

話咁快就到左24號~好乖咁同媽媽飲完茶之後清哂d report，到夜晚就同余炳炳一齊去機場啦.多謝媽媽送我落車站:)

夏天去韓國比冬天方便勁多,其實真係一個背囊已經夠,個GIP係諗住FOR戰利品...:p

今次係0係天后搭巴士去機場~唔洗拖gip周圍轉車.

已經早左去check-in(1點幾機11點幾到左了...), 點知都係無連位坐


時間流流長飲杯莫卡~點知而家星巴克大縮水@@

原來係一架超小型既機!!難怪咁早到都無連位啦~~~不過隔離0個對韓國(中年)男女因為嫌太窄, 同空中既姐姐講話要upgrade~之後空中既姐姐就話等起左飛之後就可以轉去前面(以上內容由本小姐從佢地既body language中得知),咁起左飛之後佢地果然係搬左去前面既business class XD咁就益左我地2個可以霸哂3個位啦~(其實好多人都係2個坐3個位= =)

時值深夜又咁大個位...無理由唔睏丫..

微型飛機

去到釜山上空係日出:)超靚

要坐接駁巴士到客運大樓

頹廢機場

坐巴士出市區~~好驚, 都唔知邊到落車, 好彩余炳炳有地圖, 知道過左隧道之後第2個站落...坐左好耐既車但係唔敢睏.

成功0係東萊站落到車!又係樓梯...

韓國都有免費既都市日報!!

搭地鐵去到溫泉場站, 行左好耐...先搵到個釜山最大的溫泉場>>>虛心廳(農心)

路途艱辛...第一次去無雪既韓國...原來係超級熱...

其實....我唔鍾意去溫泉...其實...我見到d唔著衫既女人周圍行好監介....其實....我見到佢地我會好自卑...其實...我唔識韓文我唔知邊d泉水係點樣浸....其實....我唔識得浸我感到好徬徨....

浸完之後玩完汗蒸幕就0係sleeping room到補眠!!好難得0係地板我可以睏咁耐...

行左好耐好多斜路好辛苦先去到釜山大學...點知天書入面講既大學路既物體咩都無- -''d餐廳又得韓文溝通不能...

最後就係0係gs mart到食呢d算:p

又係行左勁多勁多勁多既路....搵唔到個大學站既物體...入左個商場涼左陣冷氣(以往都係入商場取暖氣....)
最後都係行左返去溫泉場站...搭去凡一洞~酒店既地方

張t money去到釜山用得但係無得增值,好麻煩,最後都係要用cash買票.

個外型比想像中好....(頹廢...)....點知上到去冷氣不足...落左去counter嘈佢..原來釜山d酒店都有日間冷氣管制..

抖一陣又要去行了....今次係行山!!!去太宗臺, 個巴士站竟然係油站....

確實係行山...明明有小火車搭...但係某人點都唔比搭...不過空氣好清新, 海景都好靚.

救命寺入面有隻叫緊救命既狗...好慘呀比人放左上個好高既燈塔上面罰企...

嘔水雞泡魚.

個日落塔唔知點解唔開放= =變左睇唔到日落...唯有食個好頹既包包~(2者好似無關係...XD)

呢到秋天有紅葉，冬天有雪景，春天有櫻花, 但係夏天既不知明花花都好靚~~~

夜晚應該好靚, 但係夜晚先走應該好恐怖...

部分景點都會有呢d介紹成個釜山既touch mon

成件事變得好綠....

幾經辛苦...終於環山行左一圈..真係腳跛...唔比我搭車...我記住你!!!!

搭巴士返返凡一洞, 差d唔識落車, 原來落車個站0係正酒店對面

無意間發覺附近有間食雞泡魚既韓式餐廳!!一碗都只係6000won($42), 一大堆前菜唔洗錢非常有霸氣

但係呢隻蟹極度鮮味....好似生既一樣...咬落去得d碎殼同水....如果炸左就係我最愛既炸軟殼蟹...可惜佢呢個狀態我實在不敵其鮮味將佢投入左紙巾既懷抱...

雞泡魚湯!!估唔到我有勇氣食!!可能唔係刺生所以比較放心少少~~~不過真係好甜美爽脆!個湯撈埋d飯係超級好味!!

酒店附近根本就係紅燈區....行左去0個間現代百貨(超市)點知唔係天書所寫既close 10點半, 而係8點....shxt....死左返酒店...